Рабочая программа разработана на основе типовой программы для образовательных учреждений с родным (эрзянским) языком обучения Республики Мордовия, Эрзя–мокшонь литературань программат 5-11 класстнэнень для общеобразовательных школ Республики Мордовия  с родным (эрзянским) языком обучения, авторами которой являются доктор филологических наук А.И.Брыжинский, доктор педагогических наук А.М.Каторова, кандидат филологических наук Е.И.Азыркина.  Ссранск 2010 г. Мордовское книжное издательство.

Икельце валось

      8-це классонтень тиринь литературань коряс программась теезь Мордовия Республикань образованиянь Министерствань программанть лангс нежедезь. Весемезэ иень перть тонавтнемантень максовить 34 част, сынст ютксто произведениятнень ды литературань историянть тонавтнемантень – 20 част, аволь классо ловномантень – 4 част, келень культурань кастомантень – 10 част. Программасонть панжовить тонавтомань ёнкстнэ, кода седе парсте максомс содамочитнень ды тевс нолдамо маштомачитнень ды ёрокчитнень.

      Эрзянь келень коряс важодемань программась целанек документ, козонь совить 5 пелькст: икельце вал, учебно-тематической план, календарно-тематической план, маштомачитне, конатне эрявить содамс тонавтницятненень иень прядомадо мейле, учебно-наглядной пособиятне.      

     Ламо лия предметнэнь ютксто, конат тонавтневить школасо, неявикс тарка явови эрзя-мокшонь литературантень. Литературась сехте пек лезды сыненст чарькодемс эрямонть, пертьпельксэнь явлениятнень, домкалгавты превест-мелест, сюпалгавты кель-валост, кепеди кортамонь ды сермадомань келень культураст, келейгавты эстетической вановтост.

     Литературань произведениятнень вельде седе парсте кармить содамо эсь народонть оймензэ-иланзо, тевензэ-валонзо, седикелень эрямонзо-аштеманзо, коензэ-кирданзо, тиринь кельсэнть пингеде пингес пурнавозь превейчинть.

     Сехте покш целесь, кона путови тиринь литературань уроктнень икелев, те – тонавтомс эйкакштнэнь тиринь келентень ды литературантень, сынст вельде чарькодемс эсь народонть историянзо.

     Тиринь кельсэ сермадозь произведениятнень тонавтнемась лезды рузонь литературанть ды теке марто вейсэ лия искусствань видтнэнь, примеркс, театранть, художникень картинатнень, кинонть, седе домкасто чарькодеме ды содамо.

     Тиринь литературась кеместэ сюлмави эрямонть марто, секскак полавтоматне, конат ютыть неень шкасто, кадыть тешкс сонзэ тонавтоманзо лангс. Неень шкане тиринь литературань уроксо произведениятнень идейно-художественной питненть путомсто сави кирдемс мельсэ аволь идейно-политической енксонть, кода ульнесь икеле, а нравственноенть ды эстетическоенть.Анализэнть теемстэ васняяк эряви мель явомс ломаненть потмоежонзо панжомантень, евтамс, виде а виде эрямонть лангс писателенть вановтозо, кодамо художественно-выразительнойсредства вельде авторось панжи геройтнень тевест-валост, ванномс кель-валонь сюпавчинть. Тень пингстэ эйкакштнэ аламонь-аламонь тонадыть арсеме, эсест мелест-превест евтамо, паро енкстнэнь ды асатыкстнэнь нееме.

  Кавксоце классо фольклоронь произведениятнеде содамочитне пурнавить вейс. Теде башка, тонавтницятне теевить малавиксэкс сказительтнень шкинемаст ды М.Е.евсевьевень «Эрзянь свадьбанть» марто.

   Кавксоце классонь программантень совавтозь истят сермадейтнень произведенияст: А.И.Кочетковонь (Мокшонинь), Ф.М.Чесноковонь, конат лововить минек литературанть ушодыцякс. Седе тов тонавтнеманть поладсызь сеть, конат сермадсть Отечественной войнадонть: Л.Ф.Макулов, А.П.Тяпаев, В.Л.Алтышкин, П.А.Ключагин. прядови программась «Эрзя-мокшонь сермадейтненеень шкань эрямодонть» пелькссэнть. Тесэ ванновить С.В.Кинякинэнь, И.Н.Кудашкинэнь, В.И.Мишанинань, А.В.Араповонь, Л.П.Седойкинэнь ды лиятнень башка произведенияст.

   Кавксоце классонь программась прядови те классонть литературань историянть ды теориянть коряс содамочитнень ледстямосо.

     Домкалгавтови тонавтницятнень содамочистустно-поэтической творчествадонть, сермадейтнень творчествадост ды теоретико-литературной чарькодематнень коряс. Весе те сюпалгавты эйкакштнэнь вановтост эрямонть лангс ды эрямонь мазычинть чарькодеме.

   Кортамонь ды сермадомань кастомантень программась яви башка урокт. Эрьва классо арсезь истят литературной творческой важодемат, конатнень коряс тонавтницятне сермадыть эсест мелест.

               Литературань процессэсь а ашти ве таркасо, появить писателень од лемть, паро произведеният, секс свал эряви келейгавтомс литературной вановтнэнь ды бажамс сенень, штобу эйкакштнэ улевельть одонь содамо бажицякс.  

     Минек литературась сермадозь кавто кельсэ, но весе лия ёнкстнэнь коряс сон а явовиця, невти весе эрзятнень ды мокшотнень сюпав коест-кирдаст, ёхомарямост, превест-мелест ды бажамост. А эряви стувтнемс сеньгак: минек литературась кеместэ сюлмавозь рузонсенть марто. Улить малавикс сюжет, ве ёнов молиця темат, эрямо лувонь невтема принципть. Ламот минек писательтне тонавтнесть рузонь ды лия народонь мастертнэнь пельде.

     Тиринь литературань уроксо эрьва теманть тонавтнемазо ушодови ушодксонь занятиясо. Покш класстнэсэ ушодксонь занятиянтень максови цела урок. Ушодксонь занятиятнень целест: кастомс тонавтницятнень мелест получамс содамочить писательденть ды сонзэ произведениятнеде, анокстамс тонавтницятнень произведениянь ловномо ды парсте чарькодеме.

     Ёвтнема лувост коряс ушодксонь занятиятне эрсить эрьва кодат:

   а) писателень эрямосто саевкстнэнь, конат лездыть произведениянть чарькодемантень, ёвтнемась;

   б) тиринь ды рузонь литературань уроксо ютазь ды од материалонть марто сюлмавкстнэнь арсемась:

в) исторической, историко-литературной ды бытовой комментариень теемась;

г) произведениянть сермадомань историянзо тевс нолдамось;

д) келенть лангсо важодемась.

     Неть ёнкстнэ максовить  башка приём вельде, примеркс, ютавтовить экскурсият музейс, вирев, лугав, паксяв ды седее тов, тевс нолдавить художникень картинат ды иллюстрацият, морот, вети кортамот эйкакштнэнь пертьпельксэнь содамочидест, кармавты мельс ледстямс ютазь материалонть. Ушодксонь занятиятне ютавтовить вейкень-вейкень ёнов а молицякс. Эрьванть улезэ эсензэ чачозо, эрьва писателенть марто вастовомась кувать кадоволь эрьванть седейс.

     Ушодксонь занятиятнень ютавтомадо мейле ловновить произведениятне. IX-XI-це класстнэсэ произведениятне целанек, лирическойтнеде башка, ловновить кудосо. Произведениятнень ловномсто васняяк эряви кирдемс мельсэ сонзэ родонь ды жанрань ёнкстнэнь. Примеркс, лирической произведениятне васенцеде свал ловновить классо, гайтевстэ, мельстуезь.

     Произведениянть ловномадо мейле ушодови сонзэ смустензэ лангсо важодемась: путневить кевкстемат, тееви план ды анализ.

     Анализэнь теемстэ кочкавить истят методической приёмт, конат ладить классонтень ды тонавтнема проиэведениятненень. Те шкастонть чарькодевтеви ёвтнема лувось, темась, ёвтавить сюжетэнь, композициянь ёнкстнэ, изобразительно-выразительной средстватнень таликаст типической характертнэнь теемстэ, панжови идейной смустесь. Приёмтне, конатнень нолдавить тень пингстэ тевс , эрсить эрьва кодат: путозь проблематнень муемась ды ёвтамось, комментированной ловномась, геройтнень, сценатнень карадо-каошо аравтомась. Киносценариень теемась, превсэ-валсо портретэнь рисовамось, инсценированиясь, литературной налксематнень ютавтомась. Анализэнь тееманть кис приёмтнень кочкамсто эряви кирдемс мельсэ эйкакштнэнь иест ды литературань коряс содамочист.

Литературань коряс маштомачитне:

  - мазый ды сёлмов валсо эсь мелеть ёвтамо, беседань ветямо, лия кортамонь кунсоломо, кортамос валмеревксэнь ды цитатань совавтомо;

   - ловнозь произведениятнень содержанияст ёвтнеме;

   - бажамс чарькодеме, мезе од тейсь те эли тона писателесь литературасонть, кодамо общечеловеческой смусть кандыть сонзэ проиэведениянзо;

   - мейсэ пек парсте неявить литературанть национальной ёнксонзо;

   - эрзятнень, мокшотнень эрямонь коест ды национальной обуцянь ёнкстнэнь панжомо;

   - тиринь келенть сюпавчинть ды мазычинть невтеме.