Рабочая программа разработана на основе типовой программы для образовательных учреждений с родным (эрзянским) языком обучения Республики Мордовия, Эрзянь келень программат 5-11 класстнэнень для общеобразовательных школ Республики Мордовия  с родным (эрзянским) языком обучения, авторами которой являются Цыганкин Дмитрий Васильевич и Цыпкайкина Валентина Павловна.

Икельце вал

      8-це классонтень эрзянь келень коряс программась теезь Мордовия Республикань образованиянь Министерствань программанть лангс нежедезь. Весемезэ иень перть ютавтовить 34 част, недлязонзо – 1 час. Программасонть панжовить тонавтомань ёнкстнэ, кода седе парсте максомс содамочитнень ды тевс нолдамо маштомачитнень ды ёрокчитнень.

      Эрзянь келень коряс важодемань программась целанек документ, козонь совить 5 пелькст: икельце вал, учебно-тематической план, календарно-тематической план, маштомачитне, конатне эрявить содамс тонавтницятненень иень прядомадо мейле, учебно-наглядной пособиятне.     

Эрзянь келесь – минек тиринь келенек, кона ютась касомань ды келейгадомань пек кувака ки. Сон вансты ды пачтясы сень, мезе ульнесь ломантнень эрямосо. Эрьва народонть эсензэ келезэ, историязо.

     Тиринь келенть вельде эйкакшось карми содамо перьканзо эрямонть, сонзэ эйсэ полавтоматнень. Тиринь келесь – арсемань ды содамочинь ёнкс, паро ломанень триця-кастыця.

     Сонзэ вельде эйкакшось тееви эсь народонть эйдекс, конань а визькс невтемс весеменень.

А эрявить сеземс сеть сюлмавкстнэнь, конатне теевсть те шкантень эйкакшонть келензэ ды потмооймензэ марто. А колыть неть 5-11 класстнэсэ тонавтнема лувонтькак. Тиринь келень парсте содамось лезды пертьпельксэнть весе содамочитнень келейгавтомо. Тиринь келенть парсте содазь эйкакштнэнень седе шожда тонавтнемс рузонь ды омбо масторонь кельтнеяк.

     Неень шкань тонавтыцятнень икеле аштить истят путовкст: максомс содамочить фонетикань, лексикань, морфологиянь, синтаксисэнь, стилистикань коряс. Эряви тонавтомс эйкакштнэнь тиринь келенть валонь сюпавчинзэ, гайтевчинзэ ды мазычинзэ нееме, эсест арсемаст эрзякс ёвтамо ды сермадомо. Эряви невтемс эйкакштненень тиринь келенть питнензэ весе раськенть ды эрьва ломаненть эрямосо.

     Тонавтыцянтень эряви кепедемс эйкакштнэнь бажамост тиринь келень коряс содамочитнень саеме; кастомс эйкакштнэнь мелест седе парынестэ содамс эрзянь келень валонь сюпавчинть ды те сюпавчинть вельде тонавтомс сынст ёвтнеме эсест мелест-превест, арсемаст ды ёжомарямост.

     Тиринь келень тонавтыцянтень башка мель эряви явомс теориянь сеть кевкстематнень лангс, конат аштить видестэ сёрмадомань, пунктуациянь ды кортамонь ёрокчинь кастомань лувокс. Те лувось – гайтень ды буквань коряс валонь ванномась, пельксэнь-пелькс сынст явомась, валрисьмень ды валонь сюлмавксонь пелькстнэ.

     Теориянь коряс содамочитне максовить неень шкань келень наукань вешеманзо мельс саезь.

      8 - 9-це класстнэсэ тонавтневи синтаксисэсь ды пунктуациясь. Иень ушодовомсто васенце урокось алтазь тиринь келенть лезэнзэ панжомантень эрзянь раськенть эрямосо. Неть уроктнесэ панжови тиринь келенть питнезэ башка ломаненть ды весе раськенть эрямосо, ёвтневи эрзянь раськенть эрямодонзо кезэрень шкане, косто саевсть эрзянь ды мокшонь кельтнень лемест, эрзянь келень коряс книгань васенце сермадыцятнеде (А.Ф.Юртовдо, М.Е.Евсевьевде, А.А.Шахматовдо, Д.В.Бубрихте, А.П.Рябовдо ды лиятнеде), истя жо неень шкань ученойтнеде.

     Уроктнесэ истя жо эряви ёвтнемс сеть эрзятнеде, кить эсест тевест коряс теевсть содавиксэкс аволь ансяк минек, но и омбо масторсояк (С.Д.Эрьзядо, Никон патриархтонть, Л.А.Русланова морыцядонть ды лиятне).

     Неть уроктне лездыть кастомс эйкакштнэнь потсо эрзянь келентень мелень путома, вечкема, кепедьсызь эйкакштнэнь каштанчист эсенек раськенть кувалма.

     Неень шкасто эрьва кодамо келень тонавтнемстэ кортамонь ёрокчинь кастомась аравтови малав васенце таркас.сонзэ смустезэ сеньсэ: тонавтомс эйкакштнэнь аволь ансяк грамматикань ёнкстнэнь мукшномо-нееме ды видестэ сермадомо, но и видестэ ёвтамо эсест арсемаст.

     Эрьва пельксэнть, эрьва теманть ванномась лезды тонавтницятненень кортамонь ерокчист кепедемантень. Тенень покш нежекс карми улеме фонетикань, лексикань, морфологиянь ды синтаксисэнь чарькодематнень тонавтнемаськак.

     8-це классо ютавтовить урокт-семинарт, урокт-конференцият, урокт-симпозиумт. Васняяк панжови неть валтнэнь смустест. Истят уроктнень анокстамсто ды сынст ютавтомсто эйкакштнэ седее ламо кармить содамо эсест раськест кезэрень эрямодонзо, тонадыть седее парсте эрзякс кортамо, кассы-кепети сынст каштанчист эсест келест ды раськест кувалма.

     Кортамонь ёрокчинь кастомасонть лезэвекс кармить улеме колазь текстэнь витематне ды рузонь кельстэ эрзякс ютавтоматне. Рузонь кельстэ эрзякс ютавтоматне лездыть кепедемс тонавтницятнень валонь таштавксост ды келень ежомарямочист.    

     Эрзянь келенть тонавтнемстэ покш мель эряви явомс лия предметнэнь марто сюлмавоматненень. Сех кеметь неть сюлмавоматне тиринь литературанть марто. Келень ёнкстнэ, васняяк, ванновить художественной литературасто саевкстнэнь коряс. Кортамонь ёрокчинь кастомаськак ютавтови эрьва кодамо художественной литературань сермадовкстнэнь коряс.

     Тиринь келенть тонавтнемась кеместэ сюлмавозь рузонь ды омбо масторонь кельтнень тонавтнемаст марто. Рузонь, англань, немецень, французонь ды лия кельтнень енксост седее парсте чарькодевить, бути нежедемс тиринь келень коряс содамочитнень лангс.келень коряс вейкеть чарькодемат (подлежащей, сказуемой ды лият) улить весе неть кельтнесэ. Вейкеть чарькодемат (антонимть, эпитет, олицетвореният) вастневить тиринь келень ды литературань коряскак.

     Тиринь келень уроксто истя жо эрявить кирдемс сюлмавомат географиянть, зоологиянть, биологиянть, астрономиянть мартояк. Истя, собственной лемтнень ютамссто эряви максомс чарькодема топонимиядо, содамс эсь райононь эрзянь велетнень лемест, эсест велень перька виртнень, латкотнень, эрькетнень, лейтнень лемест. Собственной лемтнень  ютамсто истя жо мельс ледстявить эрзянь ды мокшонь художниктнень ды композитортнэнь лемест, сынст произведенияст лемест. Нарицательной лемтнень ютамсто мельс ледстявить нармунтнень, ракшатнень, унжатнень, калтнэнь ды лия мезтнень лемест. Валкстнэнь коряс эрявить муемс сеть валтнэньгак, конат меельце шкатнестэ полавтовкшность рузонсесэ ды ней таго совавтовсть кортамо рисьментень. Зоологиянь коряс тонавтнема книгастонть эряви макснемс рузонь кельстэ эрзякс ютавтнемат кодаткак ракшатнень эли нармунтнень эрямо таркадост ды обуцядост. Весе те лезды эйкакштнэнь валонь таштавксост кастомантень.

   Маштомс:

   - тевс нодамо видестэ сермадомань лувтнень ды лотксема тешксэнь путоматнень;

   - ванномо келень единицатнень фонетика, валонь теевема, лексика,синтаксис, орфография ды стилень ёндо;

   - чарькодеме неень шкань эрзянь келень лексикань ды синтаксисэнь единицатнень стилень питнест ды сайнеме сынст эсь кортамосо;

   - ёжомарямо эсь ды лия ломанень кортамосо лувонь арсеманть;

  -  теме эсь кортамонть прок описания, повествования, рассуждения, кемекстамо;

   - эсь кортамос лексикань ды грамматикань синонимтнень саеме;

   - теме кортамо тиринь веледе, эсь раськеденть, эрямодо-аштемадо, уроксо ютазь теманть коряс;

  -  ёвтамо эсь мелеть-преветь уроксо, промкссо;

   - ёвтнеме неезь кинонть, спектаклянть;

   - аравтнеме эсь прянть авторонть таркас, произведениянь лия ушодксонь или пень арсеме, лия героень совавтомо, ёвксонь, очеркень, ёвтнемань ды лия произведениянь арсеме;

Содамс:

   - эрзянь келень коряс валкстнэнь ды маштомс сынст тевс нолдтнеме;

   - кодамо эрзянь келенть тарказо модамасторонь весе лия кельтнень ютксо, кода нолдави тевс тиринь келесь ломаненть эрямосо, кода тонавтневи сон наука ёндо ды кить сонзэ тонавтницянзо.