Тиринь литературань уроктненень  9 классо

    Важодемань программась кандови 9 классо тонавтницятненень ды нежедеви меельце документнэнь лангс: Эрзя-мокшонь литературань программат 5-11 класстнэнень.Сермадыцятне  : А.И.Брыжинский, А.М.Каторова, Е.И.Азыркина. Саранск. Мордовской книжной издательствась. 2010 ие. Программась ашти учебникень коряс «Тиринь литература»  9 класснэнь.

 Авторось: А.И.Брыжинский.

Саранск, Мордовской книжной издательствась, 2008 ие. 

Материалось ловозь 1 час недляс (иезэнзэ 34 часст)

   Лия ламо предметнэнь ютксто, конат тонавтневить школасо, неявикс тарка явови эрзя-мокшонь литературантень. Тиринь кельсэ сёрмадозь произведениятнень марто пакшатне теевить содавиксэкс васняяк начальной школасо, седе мейле художественной литературадо содамочитнень таштыть средней ды покш классо тонавтнемстэ. Литературась сехте пек лезды сыненст чарькодемс эрямонть, пертьпельксэнь явлениятнень, домкалгавты превест-мелест, сёрмадомань келень культураст, келейгавты эстетической вановтост.

   Литературань произведениятнень вельде тонавтницятне седе парсте кармить содамо эсь народонть оймензэ-иланзо, тевензэ-валонзо, седикелень эрямонзо-аштеманзо, коензэ-кирданзо, тиринь кельсэнть пингеде пингес пурнавозь превейчинть. 

   Сехте покш целесь, кона путови тиринь литературань уроктнень икелев, те – тонавтомс эйкакштнень тиринь келентень ды литературантень, сынст вельде чарькодемс эсь народонть историянзо.

   Тиринь кельсэ сёрмадозь произведениятнень тонавтнемась лезды рузонь литературанть ды теке марто вейсэ лия искусствань видтнэнь, примеркс, театранть, художникень картинатнень, кинонть, седе домкасто чарькодеме ды содамо.

   Тиринь литературась кеместэ сюлмави эрямонть марто, секскак полавтоматне, конат ютыть неень шкасто, кадыть тешкс сонзэ тонавтоманзо лангс. Неень шкане тиринь литературань уроксо произведениятнень идейно-художественной питненть путомсто сави кирдемс мельсэ аволь идейно-политической ёнксонть, кода ульнесь икеле, а нравственноенть ды эстетическоенть. Анализэнть теемстэ васняяк эряви мель явомс ломаненть потмоёжонзо панжомантень, ёвтамс, виде а виде эрямонть лангс писателенть вановтозо, кодамо художественно-выразительной средства вельде авторось панжи геройтнень тевест-валост, ванномс кель-валонь сюпавчинть. Тень пингстэ эйкакштне аламонь-аламонь тонадыть арсеме, эсест мелест-превест ёвтамо, паро ёнкстнэнь ды асатыкстнэнь нееме.

   Тиринь литературанть коряс программанть сёрмадомсто автортнэ мельсэ кирдизь ды тевс нолдызь сеть паро ёнкстнэнь, конат таштавсть сынст теемстэ ведьгеменде ламо иетнень перть. Тонавтнемс саезь сеть произведениятне, конат кандыть алкуксонь нравственной ды эстетической питне.

   Программасонть покш мель явозь предметнэнь ютксо сюлмавкстнэнень. Тиринь литературанть тонавтнемстэ тонавтыцянтень свал эряви маштомс тевс нолдамс сеть материалтнэнь, конат келейгавтыть тонавтницятнень содамочист.

   Тиринь литературань тонавтыцясь теоретической чарькодематнень тонавтнемстэ нежеди истят принциптнень лангс:

1. Произведениятнень ловноманть ды теоретико-литературной чарькодематнень ютксо сюлмавомась.
2. Те эли тона чарькодеманть лангсо наблюдениянь ветямось, определениянь ёвтамось ды произведениятненень анализэнь теемстэ тевс нолдамось.
3. Теоретико-литературной чарькодематнень тонавтнемстэ эрзянь ды рузонь литературань уроктнень ютксо сюлмавомась.
4. Теориянть тонавтнемстэ эйкакштнень келень культураст кастомась.
5. Литературань теориянь чарькодематнень свал мельсэ кирдемась ды системас пурнамось.

   Теде башка, мельсэ кирдьсынек теориянь содамочитнень-критерийтнень:

1. Литературань теориянь чарькодематнень определениянть содамось.
2. Художественной произведениясто изобразительно-выразительной средстватнень муемась ды сынст функцияст ёвтамось.
3. Произведениятнень анализэнь теемстэ теоретической содамочитнень тевс нолдамо маштомась.
4. Творческой роботань сёрмадомсто теоретико-литературной чарькодематнень саемась.

                                                   Литературась

1. 1. 1. Учебник – хрестоматия  Тиринь литература 9 классонь. Анокстыцятне: А.И.Брыжинский.  Саранск. Мордовской книжной издательствась, 2008 ие.
      2. Поурочной плант.