Чарькодевтемань сёрмадовкс

                        Эрзянь келень уроктнененнь 9 классо

    Важодемань программась кандови 9 классо тонавтницятненень ды нежедеви меельце документнэнь лангс: Эрзянь келень программат 5-11 класстнэнень. Кемекстызь Д.В.Цыганкин, В.П.Цыпкайкина, Саранск. Мордовской книжной издательствась. 2001г. Программась ашти учебникень коряс «Эрзянь кель» эрзянь школань 9 класснэнь Н.И. Рузанкин, Саранск, Мордовской книжной издательствась, 2009 ие.

Материалось ловозь 1 час недляс (иезэнзэ 34 часст)

   Келесь – кезэрень вейсэнь лувонь эрямонь ёнкс. Келенть вельде ломантне кортыть эсь ютковаст, ёвтыть мелест-арсемаст, чарькодить вейкест-вейкест.

   Эрзянь келесь – минек тиринь келенек, кона ютась касомань ды келейгадомань пек кувака ки. Сон ванстсы ды пачтясы сень, мезе ульнесь ломантнень эрямосо. Эрьва народонть эсензэ келезэ, историязо.

   Тиринь келенть вельде эйкакшось карми содамо перьканзо эрямонть, сонзэ эйсэ полавтоматнень. Тиринь келесь – арсемань ды содамочинь ёнкс, паро ломанень триця-кастыця. Сонзэ вельде эйкакшось тееви эсь народонть эйдекс, конань а визькс невтемс весеменень.

    А эряви сеземс сень сюлмавкстнэнь, конатне теевсть те шкантень эйкакшонть келензэ ды потмооймензэ марто. А колыть неть сюлмавкстнэ 5-11 класстнэсэ тонавтнема лувонтькак. Тиринь келень парсте содамось лезды пертьпельксэнть весе содамочитнень келейгавтомо. Тиринь келенть парсте содазь эйкакштнэнень седе шожда тонавтнемс рузонь ды омбо масторонь кельтнеяк.

   Неень шкань тонавтыцятненень эряви максомс аволь ансяк сатышка содамочить фонетикань, лексикань, морфологиянь, синтаксисэнь ды стилистикань коряс. Эряви тонавтомс эйкакштнэнь тиринь келенть валонь сюпавчинзэ, гайтевчинзэ ды мазычинзэ нееме, эсест арсемаст эрзякс ёвтамо ды сёрмадомо. Эряви невтемс эйкакштнэнень тиринь келенть питнензэ весе раськенть ды эрьва ломаненть эрямозо.

   Неть путовкстнэ покшт ды шождынеть. Сынь вадрясто топавтовить ансяк сестэ, зярдо сонсь тонавтыцясь свал вети тевензэ мелень путозь, весеме ёндо домкалгавты ды келейгавты эсь анокчинзэ, зярдо сон вечксынзе  эйкакштнэнь, эсь тевензэ, свал вешни од кить тонавтома лувонть седе тов паролгавтомга.

                                      Сёрмадовксонть лувозо

   Эрзянь келень тонавтыцятненень эряви парсте содамс ушодксонь класстнэсэ саезь содамочитнень, тевс маштомачитнень ды ёрокчитнень. Тень лангс нежедезь, тонавтневи тиринь келесь 5-9 класстнэсэ. Тонавтыцянтень эряви кепедемс эйкакштнэнь бажамост тиринь келень коряс содамочитнень саеме; кастома эйкакштнэнь мелест седе парынестэ содамс эрзянь келень валонь сюпавчинть ды те сюпавчинть вельде тонавтомс сынст ёвтнеме эсест мелест-превест, арсемаст ды ёжомарямост.

   Тиринь келень тонавтыцянтень башка мель эряви явомс теориянь сеть кевкстематнень лангс, конат аштить видестэ сёрмадомань, пунктуациянь ды кортамонь ёрокчинь кастомань лувокс. Те лувось- гайтень ды буквань коряс валонь ванномась, пельксэнь-пелькс сынст явоаомась, кортамо пелькстнэнь эрьвейкедест явовомась, валрисьмень ды валонь сюлмавксонь пелькстнэ.

   Теориянь коряс содамочитне максовить неень шкань келень науканть вешеманзо мельс саезь. Эрьва классо иенть ушодовомсто васенце урокось алтазь тиринь келенть лезэнзэ панжомантень эрзянь раськенть эрямосо. Мель явови сень лангскак, косо ней тонавтневи эрзянь келесь.

                                       Кортамонь ёрокчинть кастомась

   Программасонть башка пельксэкс максови кортамонь ёрокчинь кастомась. Неень шкасто эрьва кодамо келень тонавтнемстэ сон аравтови малав васенце таркас. Сонзэ смустезэ сеньсэ: тонавтомс эйкакштнэнь аволь ансяк грамматикань ёнкстнэнь мукшномо-нееме ды видестэ сёрмадомо, но и видестэ ёвтамо эсест арсемаст. Икелень программанть коряс кортамонь ёрокчинь кастомань туртов максовить седе ламо част.

   Эрьва пельксэнть, эрьва теманть ванномась лезды тонавтницятненень кортамонь ёрокчист кепедемантень. Тенень покш нежекс карми улеме фонетикань, лексикань, морфологиянь ды синтаксисэнь чарькодематнень тонавтнемаськак.

   Кортамонь ёрокчинь кастомась ютавтови зярыя ки вельде, конатне вейкест-вейкест марто кеместэ сюлмазь.

   Васенце кись – те сюпалгавтомс тонавтницятнень валонь таштавксост. Те тевсэнть лездыть свалшкань ютавтневиця эрьва кодат упражнениятне, диктантнэ, изложениятне ды сочинениятне. Эряви тонавтомс учениктнень нееме асодавикс ды ачарькодевикс валтнэнь, кевкстеме сынст смустест тонавтыцянть кедьстэ или, седеяк паро, ваномс сынст валкссто.

   Омбоце кись – те литературань кель

ень видестэ ёвтамонь, видестэ сёрмадомань, валонь ды формань теемань ды валрисьмень теемань лувтнень тонавтнемась.

   Колмоце кись – те тонавтомс эйкакштнэнь эсь арсемаст, мелест-ёжост ёвтнеме. Весе те лезды эйкакштнэнь валонь таштавксост кастомантень.

                                           Литературась

1. Эрзянь кель учебникесь 9-це классонь. Сёрмадызе / Т.М.Тихонова, Н.И. Рузанкин, . Саранск. Мордовской книжной издательствась, 2009ие.
2. Поурочной плант.
3. Эрзянь-рузонь валкс. Сёрмадызе В.С.Щемерова.Саранск. Мордовской книжной издательствась. 1993 ие.